Halkymyzyň agzybirligini, jebisligini, ynsanperwerlige, asylly däp-dessurlara ygrarlylygyny açyp görkezýän, adamlaryň arasyndaky hoşniýetli gatnaşyklary pugtalandyrýan, her bir öý-ojakda, maşgalada giňden bellenip geçilýän mukaddes Gurban baýramy mynasybetli dabaralar Diýarymyzyň çar künjüni gurşap alýar. Hormatly Prezidentimiziň Permanyna laýyklykda, üç günläp dowam edýän bu gadymy baýramçylyk ýurdumyzyň welaýatlarynda-da turuwbaşdan giň gerimli dabaralara beslenýär.
Gurban baýramynyň ilkinji gününiň ir säherinde welaýatlaryň merkezindäki baş metjitlerde we beýleki ähli metjitlerde baýram namazy okaldy. Soňra bu mukaddes toýuň dabaralary şäherdir şäherçelerde, obalarda uly ruhubelentlige beslendi. Ýurdumyzyň sebitlerindäki «Türkmeniň ak öýi» binalarynyň öňünde, Änew şäherindäki merkezi seýilgähde guralan dürli görnüşli çäreler aýdym-sazly çykyşlara utgaşdy.
Paýtagtymyz Aşgabatda bolsa Gurban baýramynyň ilkinji gününiň dabaralary Döwlet sirkiniň öňündäki meýdançada ýaýbaňlandyryldy. Bu ýerde toý gazanlary atarylyp, datly tagamlar taýýarlanyldy we birek-birege hödür-kerem edildi. Meşhur estrada aýdymçylarynyň, folklor, tans toparlarynyň belentden ýaňlanan aýdym-sazly çykyşlary, milli toý lybaslaryny geýnen ýaş oglan-gyzlary töwereginde jemlän hiňňildikler dabara özboluşly öwüşgin çaýdy.
«TürkmenGazet».
