Ýer ýüzünde ilkinji pul biziň eýýamymyzdan öňki 970-njy ýylda hytaýlylar tarapyndan ýasalypdyr. Ilkinji banknoty bolsa, 1661-nji ýylda şweýsariýalylar çykarypdyr.
Rim imperatory Sezar döwletiň ösmeginde ilatyň roluna uly ähmiýet beripdir. Şonuň üçin hem ol köp çagaly maşgalalara artykmaç hukuklar berip, tersine, az çagalylary käbir hukuklardan mahrum edipdir.
X asyrda Bagdat halyfatynyň köşgünde düşelen halylaryň sany 22 müňe ýetipdir. Diwardan asylyp goýlan halylaryň sany bolsa 38 müň bolup, olaryň 12 müň 500-si ýüpekden dokalypdyr.
Ilkinji gezek bilim berýän hassahana Siriýanyň Damask şäherinde açylypdyr.
Hytaýlylar mundan 2200 ýyl öň hem futbol oýnuny oýnapdyrlar.
Bir müsür şasynyň mazarynyň üstünden 3300 ýyl geçen bal tapylypdyr. Üstünden şonça ýyl geçendigine seretmezden ol bal arassalygyny hem-de täzeligini saklapdyr.
Belli kompozitor Riçard Wagner ”Tristan we Izolda” atly meşhur operasynyň sazlaryny düýşünde düzüpdir.
Dünýä belli suratkeş Pikasso 13 müň 500-den gowrak surat çekipdir we 300 sany heýkel ýasapdyr.
Meşhur şahsyýet hökmünde dünýä sungatynda yz galdyran Mikalenželo belli heýkelini derde ýaramsyz hasaplanyp goýlan daşdan ýasapdyr. Haçan-da ondan: ”Sen muny nädip başardyň” diýip, soranlarynda ol: ”Şu daşyň golaýyndan geçip barýan wagtym daşyň içinden “Meni bu ýerden çykar” diýen ses gulagyma eşdilen ýaly boldy” diýipdir.
Şöhrat SÄHETMYRADOW,
Seýitnazar Seýdi adyndaky Türkmen döwlet mugallymçylyk institutynyň taryh hünäriniň 4-nji ýyl talyby.
