Agyr atletika-hakyky pälwanlaryň bäsleşigi. Agyr ştangany ýokary galdyrmak boýunça bu sport görnüşiniň gadymy Gresiýada döräli bäri, muşdaklarynyň sany barha artýar. Türkmen sportunyň taryhyna öz adyny altyn harplar bilen ýazdyrmagy başaran agyr atletikaçylaryň biri hem Altymyrat Orazdurdyýewdir.
Türkmeniň beýik ogly A.Orazdurdyýew 1969-njy ýylyň 16-njy iýunynda Mary welaýatynyň Sakarçäge etrabynyň Akýap obasynda dünýä inýär. Entek Altymyrat dünýä inmänkä,onuň kakasy aradan çykýar. Adatça, eneler öz çagalaryny 1-2 ýaşda süýtden aýyrýan bolsalar, Altymyradyň ejesi Oguldurdy daýza ony 5-6 ýaşyna çenli ene süýdünden aýyrmaýar. Altymyrat maşgalada körpe çaga bolansoň, has hem lälik ösýär. Ähli kişi ony ezizleýär. Haçan-da Altymyradyň agalary onuň ýaşynyň ulalandygyna garamazdan, ene süýdünden aýrylmaýandygyndan zeýrenenlerinde, Oguldurdy daýza: “Ine, görersiňiz, ene süýdi meniň balamy pälwan ýigit edip ýetişdirer!” diýip jogap berýär. Ol iň kiçi perzendiniň gujur-gaýratyna, geljekde güýçli pälwanlaryň biri boljakdygyna ynanýar. Soňra Altymyrat öz käbesiniň ynamyny artygy bilen ödeýär. Altymyradyň baba tarapy öz döwrüniň ady belli pälwanlarynyň biri bolupdyr. Altymyrat ýedi ýaşyna ýetende, öz obasyndaky 5-nji mekdebe okuwa barýar. Okuwdan soň Sakarçäge etrap merkezinde agyr atletika boýunça tälimçi bolup işleýän agasynyň ýanyna gatnap başlaýar. Ol ýerde irginsiz türgenleşýär. Soňra ýakynlarynyň maslahatyna eýerip, Aşgabadyň sport mekdep internatyna okuwa gidýär. Oňa bu ýerde Bruno Sumbatowiç Abramýan tälim berip başlaýar. Tiz wagtdan bäsleşiklerde ýeňiş üstüne ýeňiş gazanyp, ýurduň çäginde “Altyşka” lakamy bilen tanalyp başlaýar. A.Orazdurdyýew sport mekdebini gutarandan soň, goşun gullugyna alynýar.
1988-nji ýylda öňki SSSR döwletleriniň gatnaşmagynda, Samarkantda agyr atletika boýunça SSSR-iň çempionaty geçirilýär. Ol şonda I orny eýeläp, türkmen ştangaçylarynyň arasynda iň ilkinji gezek SSSR-iň kubogy bilen sylaglanýar. 1989-njy ýylda ABŞ-nyň Florida ştatynyň Fordloderdeýl şäherinde geçirilen dünýä çempionatynda ol jemi 357,5 kg agyrlyk göterip,dünýäniň çempiony bolýar. 1990-njy ýylda Daniýanyň Olborg şäherinde agyr atletika boýunça Ýewropa çempionatynda altyn medaly eýeläp, Ýewropanyň çempiony bolýar.1993-nji ýylda dünýä rekorduny goýýar. 1994-nji ýylda Ýaponiýanyň Hirosima şäherinde geçirilen Aziýa çempionatynda birinji orny eýeläp, Aziýanyň çempiony bolýar. A.Orazdurdyýewiň gazanan üstünlikleri, türkmen sportuna getiren abraýy örän uludyr.
Türkmen ştangaçylaryndan ilkinji bolup Aziýanyň, Ýewropanyň ýeňijisi we dünýäniň 3 gezek iň güýçli agyr atletikaçysy adyny alan Altymyrat Orazdurdyýewiň ömür tanapy juda gysga hem bolsa,türkmeniň gerçek ýigidiniň şöhraty bakydyr. A.Orazdurdyýew 1997-nji ýylda, heniz 28 ýaşy hem dolmanka, Aşgabat şäherinde aradan çykýar. Häzirki wagtda Mary welaýatynyň Sakarçäge etrabynda Altymyrat Orazdurdyýewiň adyny göterýän sport mekdebi bar.
Muhat MUHADOW,
Türkmenistanyň Döwlet energetika institutynyň 2-nji ýyl talyby.
