Wagt tizlige saralan surat görnüşleri ýaly diýseň çalt geçýär. Wagt barada pikir eden mahalym Şopenhaweriň: “Her bir adam wagtyny nähili sarp etjegi barada pikir edýär, akylly adam bolsa ony nädip tygşytlajagyny” diýen sözleri ýadyma düşýär. Bu jümleleriň aňyrsynda näçe çuň many bar.
Adam heniz ýaş mahaly tiz ulalmagy, wagtynyň bolsa çalt geçmegini isleýär. Haçan-da ol ulalanda bolsa, özüniň ýaşlygyna dolanasy gelýär, ýerliksiz ýere bisarpa tutan wagtlaryny yzyna gaýdyp alasy gelýär. Ýöne bu hyýaly arzuw bolup galýar. Näme üçin adamlar öz elindäki zatlaryň gadyryny wagtynda bilmeýärlerkä?! Bir zady elden gidirensoňlar yzyna gaýtarmak isleýärler. Ýöne bu başa barmaýar.
Wagtyň geçmegi bilen her bir adamyň dünýägaraýşy giňeýär, pikiri taplanýar, kämilleşýär. Geliň, şu günden başlap wagtyň gadyryny bileliň, öz wagtymyzy özümiz bisarpa tutmalyň. Okalyň, öwreneliň, her bir minudymyzy ýerlikli ulanalyň!
Humaýtäç BAGŞYÝEWA,
Türkmenistanyň Döwlet energetika institutynyň 2-nji ýyl talyby.
