- Dogry sözli adamyň görki, ömri we döwleti zyýada bolar.
- Ene-atadan soňra iň ýakyn syrdaşyň – dostuň, hatda ene-ata ýaňzytmaga çekinýän käbir pikirleriňi hem ynamdar dostuň bilen paýlaşyp bolýar.
- Güler ýüzlülik we ýylgyryş ýüreklere ýollanýan dostluk çakylygydyr.
- Halal lukma ýaly haýyrly zat ýokdur. Dogry söz ýaly ygtybarly dost ýokdur.
- Häsiýeti ýumşak adam asylly saýylar. Özüni sypaýyçylykly alyp barýanyň mertebesi beýgeler.
- Iň abraýly iş – şöhrat getirer, iň ýagşy hereket – öwgä ýetirer. Iň ýaman iş – buýsanjyňy ýatyrar, iň ýaramaz hereket – abraýyňy döker.
- Iň ajaýyp zat – gözel işler bilen utgaşan dogry sözdür.
- Iň ýagşy ýardam – perişan kişä goltgy bermek.
- Kim bilen dostlaşmakçy bolsaň, ilki ony ýagşy tana, çünki häsiýet juda ýokuşýan zatdyr. Ýagşydan ýagşy häsiýetler, ýamandan ýaramaz häsiýetler ýokuşar.
- Kim gaýrat basgançagy bilen ýokary galsa, il-günüň gözünde abraýy belent bolar. Kim janypkeş bolsa, halk arasynda gadyr-gymmaty artar.
- Kim özüne bolan söýgi we umyt döredip bilýän bolsa, bu onuň ata-baba asyllydygyna delildir.
- Kim ýagşy adamlara ýoldaş bolsa, işi rowaç bolar. Kim ýaramazlar bilen dost bolsa, bereketden mahrum galar.
- Pespällik asylzada adamlaryň bezegidir. Dostluk mylakatly adamlaryň hemrasydyr.
- Seni makullaýanlaryň ählisi dost däldir. Seni tankytlaýanlaryň ählisi hem görip däldir. Dogruçyllyk bilen iş salyşýan adamlar dostuňdyr.
- Süýji sözli adamyň häsiýeti hem gözel bolar. Häsiýeti gowy adamyň niýeti hem gowudyr. Niýeti ýagşy adamyň geljegi has owadandyr.
- Ýagşy adamy görseň, ony dost tutun, Allanyň oňa ýagdyrýan bereketinden saňa-da paý ýeter.
- Ýagşy işe amal etmeýän bolsaň, ýaman işe öjükdirýän bir bolma.
- Ýagşylyk etseň, ile ýaýma, ört. Saňa ýagşylyk etseler, gizleme, ýaýrat.
- Ýamanlyklaryňy gizleýşiň ýaly, ýagşylyklaryňy-da gizle.
- Ýaramaz adamlar bilen tirkeşmek, ýagşy adamlar barada erbet pikir etmeklige sebäp bolar.
- Ynsanlaryň iň ejizi dost tutunmagy başarmaýanydyr.
- Ynsanyň ýürekden salam bermegi, toý-märekede ýer bermegi we iň gowy sözler bilen ýüzlenmegi dostlugyň ilkinji ädimleridir.
Taýýarlan: Mahym ATAÝEWA,
Döwletmämmet Azady adyndaky Türkmen milli dünýä dilleri institutynyň rus dili we edebiýaty fakultetiniň 3-nji ýyl talyby.
