Tutuş yslam dünýäsinde aýratyn gadyr-gymmat bilen bellenilýän Oraza baýramy ýetip geldi. Mukaddes Remezan aýynda berjaý edilýän Oraza ybadatynyň tamamlanmagy mynasybetli gadymy döwürlerden bäri bellenilip gelinýän bu nurana baýram ýurdumyzda milli baýramlarymyzyň sanawyna girdi.
Oraza parzyny berjaý eden, otuz günüň dowamynda agyz bekläp, tarawa namazlaryny okap, il-günüň, ýurduň abadanlygynyň hatyrasyna doga-dileg eden ildeşlerimiz bu gün öz maşgala agzalaryndan, ýakyn hossarlaryndan we tanyşlaryndan ýakymly gutlaglary kabul edýärler, biri-birini nurana baýram bilen mähirli gutlaýarlar. Ýurdumyzyň dürli künjeklerindäki metjitlerde bu gün adamlar baýram namazyna gelýärler.
Öňden gelýän asylly däplere eýerilip, bendilikde oturan ýüzlerçe adam mukaddes Remezan aýynyň Gadyr gijesi mynasybetli, hormatly Prezidentimiziň Permany bilen, jeza çekmek çäresinden boşadyldy. Arkadagly Serdarymyzyň bu uçursyz sogap işi rehimdarlygyň nusgasy hökmünde mukaddes aýdaky haýyr işleriň üstüni doldurdy.
Bu mukaddes aýyň dowamynda aňymyza, ýürek-kalbymyza ornaşan, ynanç-ygtykadymyza siňen täsirler we duýgular bizden aýrylyp gitmez, hemişelik biz bilen galar. Edil rysgal-döwletli kişiden alnan teperrik ýaly, olar biziň bagtyýarlygymyza we şükranalygymyza, rehimdarlygymyza we sahawatlylygymyza gönezlik bolar. Agyz beklän ähli musulmanlar ýaly, biz şu günki Oraza baýramyna, ýadap-surnugyp däl-de, bedenimizi we saglygymyzy berkidip, ruhumyzy baýlaşdyryp ýetdik.
Parzyny berjaý kylan adamyň, edil birewe bergisini üzüp dynan ýaly, ruhy belent bolup, kalby rahatlyk tapýar. Özüne-de, özüniň goraglylygyna-da, Hakdan dileýän hajatlarynyň kabul boljakdygyna-da ynamy berkeýär. Ynamy berk adam bolsa hemişe öz erkine eýe. Onuň pikiri sagdyn, arzuw-meýilleri hem akylly, ýüregi rehimli we sahawatly bolýar. Ine, şu-da biziň mukaddes Remezan aýyndan tapan berekedimiz.
Adamlary päkizelige, sahawatlylyga, agzybirlige çagyryjy Oraza ybadatyny tamamlan, säher bilen Baýram namazyny okan ildeşlerimiz bu gün nurana Oraza baýramyny belleýärler. Orazalaryňyz kabul bolsun, baýramyňyz gutly bolsun, eziz ildeşler!
Şöhrat JODYÝEW,
TDP-niň Köýtendag etrap komitetiniň bölüm müdiri.
