Türkmen-katar gatnaşyklary asyrlaryň jümmüşinden gözbaş alýar we umumy ruhy-medeni gymmatlyklarda jemlenen dostlukly gatnaşyklara esaslanýar. Häzirki wagtda bu gymmatlyklar iki doganlyk halkyň has-da ýakynlaşmagyna ýardam edýär.
Türkmenistanyň daşary syýasatynda Ýakyn Gündogar sebitiniň döwletleri, şol sanda ösen ykdysadyýeti we özboluşly medeniýeti bolan Katar döwleti bilen syýasy, ykdysady, hem-de medeni-ynsanperwer gatnaşyklary ösdürmek ileri tutulýan ugurlaryň hataryndadyr. Mälim bolşy ýaly, Türkmenistan bilen Kataryň arasyndaky diplomatik gatnaşyklar 1996-njy ýylyň 22-nji noýabrynda ýola goýuldy. Häzirki wagtda ikitaraplaýyn düşünişmek we deňhukuklylyk ýörelgelerine eýerilýän, ykdysady we medeni-ynsanperwer ugurlarda pugtalandyrylýan türkmen-katar gatnaşyklary hil taýdan täze derejä eýe boldy.
Katar döwletine resmi sapar Türkmenistanyň Prezidenti tarapyndan 2010-njy ýylyň oktýabr aýynda amala aşyryldy. Munuň özi iki döwletiň we olaryň dostlukly halklarynyň bähbidine laýyk gelýän köpugurly netijeli gatnaşyklaryň mundan beýläk-de ösdürilmeginde möhüm ädim boldy. 2016-njy ýylyň martynda Kataryň Emiri ýurdumyzda resmi saparda boldy. Saparyň netijeleri boýunça gazanylan ylalaşyklar netijeli hyzmatdaşlygy işjeňleşdirmäge esas bolan resminamalar toplumynyň üstüni ýetirdi.
2022-nji ýylyň 3-nji dekabrynda hormatly Prezidentimiz Serdar Berdimuhamedow Kataryň Emiri Şeýh Tamim bin Hamad Al Taniniň çakylygy boýunça Katar Döwletine saparyny amala aşyryp, ol ýerde hemmetaraplaýyn türkmen-katar gatnaşyklaryny ösdürmek bilen bagly ýokary derejede duşuşyk geçirdi hem-de Dohada geçirilen Futbol boýunça dünýä çempionatynyň oýunlarynyň biriniň hormatly myhmany boldy. Doha şäherinde ýokary derejedäki ikitaraplaýyn duşuşygyň dowamynda dostlukly, özara hormat goýmak häsiýete eýe bolan döwletara gatnaşyklaryň häzirki ýagdaýy we geljegi ara alnyp maslahatlaşyldy.
Mekan ROZYÝEW,
TDIM-niň Halkara gatnaşyklary institutynyň Halkara ykdysady gatnaşyklary fakultetiniň 1-nji ýyl talyby.
