Täze ýyl – hemmeleriň söýgüli baýramy. Şu baýramçylyk golaýlaýaram welin, uly-kiçi hemmeleri ýakymlyja duýgular gurşap alýar.
Aýazbaba, Garpamyk, sowgatlar hakyndaky şirin arzuwlar, ýagşy umytlar kalplara dolýar. Ýylboýy şu baýramçylyga sabyrsyzlyk bilen garaşan arçalar bezemen kaşaň lybaslaryny geýýärler, jäjeklerini dakynyp, täze ýyly garşy alýarlar. Täze ýyl aýdymlary, şirin arzuwlar ýaňlanyp başlaýar.
Täze ýyl baýramy ähli ynsanlarda, aýratyn hem bagtyýar çagalarda uly joşgun döredýär. Ýurdumyzyň ähli ýerlerinde dürli öwüşginli yşyklar bilen bezelen arçalar, täze ýyl bezegleri, dürli ertekileriň we multfilmleriň gahrymanlary halkymyzyň we körpeleriň baýramçylyk şatlygyny goşalandyrýar. Aýazbabadyr Garpamyk körpeler bilen el tutuşyp täze ýyl arçasynyň daşyndan aýlanýarlar. Aýazbaba çagalara sowgatlary paýlap, olary begendirýär. Täze ýyl arçalarynyň töwereginde çagalaryň bagtyýarlygy, mähriban Arkadagymyzyň körpeler hakynda edýän bimöçber aladalary goşgularydyr aýdymlarda, şadyýan gülkülerde belentden ýaňlanýar.
“Älem” medeni dynç alyş merkeziniň öňünde bezelen baş arçanyň hem-de ýurdumyzyň ähli künjeklerinde dürli öwüşgine beslenen arçalaryň töweregi baýramçylyk günlerinde diýseň köp adamly. Bu ýere gelen raýatlaryň ýüzlerinde täze ýyl şatlygy, geljekki ýyla bolan umyt we bagtyýar döwrümize bolan ümmülmez buýsanç duýulýar.
Täze 2023-nji ýylymyz halkymyz üçin ýagşy arzuw-niýetleriň hasyl bolýan ýyly bolsun! Ýurdumyzda uly üstünlikleriň gazanylýan ýyly bolsun! Her bir raýatymyza bagt, üstünlik we rowaçlyk getirsin! Bedew bady bilen öňe barýan eziz Diýarymyzyň beýik ösüşleri dowamat-dowam bolsun!
Döwletmyrat ANYÝEW,
Türkmen oba hojalyk institutynyň mugallymy.
