Türkmen halky hem dünýä halklarynyň ýüzlerçesi bilen bilelikde Täze ýyl baýramyny garşy almaga taýýarlanýar. Hut şu günler paýtagtymyzyň gözel keşbinde baýramçylyk pursatlaryny, baýramçylyk keýpini görmek bolýar.
Täze ýyl baýramynyň gelýänligini aňladýan bezegler, owadan arçalaryň bezemen syraty, gijelerine ýanyp-sönýän çyrajyklaryň tansy, gündizlerine bazarlarda we dükanlarda satlyga çykarylan täze ýyl nyşanjyklary, öýlerde gurnamak üçin niýetlenen arçalaryň bazary, Aýazbabanyň çagajyklara paýlaýan baýramçylyk sowgatlary, süýji-kökeler, gök-miwe önümleri göwnümize heýjan salyp, köne ýylyň soňky günlerini has-da süýjedýärler. Şu günler ildeşlerimiz hem Täze ýyl gijesinde saçaklary bezemek, dost-ýarlary baýramçylyk sowgatlary bilen begendirmek maksady bilen täsirlije sowgatlaryň, şirin-şeker süýji tagamlaryň gözleginde.
Golaýda hormatly Prezidentimiz il-günümiziň baýramçylyk şatlygyny goşalandyran tabşyryklar berip, Täze ýyl baýramy mynasybetli baýramçylyk söwdalarynyň giňden guralmagyny, gerekli harytlaryň elýeterli bahalardan bolluk bilen halkymyza hödürlenmelidigini tabşyrdy. Türkmen bazarlarynyň ene topragymyzda önýän bol berekediň mekanydygy bizi buýsandyrýar. Täze ýyl saçagyny giňden ýazyp, bu nygmatlardan dürli-dümen tagamlary taýýarla-da goýuber. Täze ýyla niýetlenen rysgal-döwlet siziň saçagyňyza bereket bolup dolar. Şunuň ýaly bereketli bazarlarymyzyň daşyndaky meýdançalarda guralýan baýramçylyk söwdalary bolsa, il-günümiz üçin döredilýän ýene bir mümkinçilik bolup durýar.Satyn alynjak zady synlamaga, söwdalaşmaga döredilen giňişlik, satyjylaryň güler ýüzliligi, harytlaryň bolçulygy alyjylarda gowudan gowusyny satyn almaga höwes döredýär.
Tylla HOJAGULYÝEWA,
S.A.Nyýazow adyndaky Türkmen oba hojalyk uniwersitetiniň talyby.
