Şu gün – 12-nji dekabrda Özbegistanyň Daşkent şäherindäki «Hyatt Regency Tashkent» myhmanhanasynda GDA gatnaşyjy döwletleriň döredijilik we ylmy intelligensiýasynyň XV forumy öz işine başlady. Bu barada «Türkmenistan» gazetiniň degişli internet sahypasynda habar berildi.
Arkalaşygyň giňişliginde ýylyň iň esasy ynsanperwer ugurly çäresi hasaplanýan bu foruma Türkmenistandan hem medeniýet, sungat, ylym, bilim ulgamlaryna wekilçilik edýän agzalardan ybarat bolan wekiliýet gatnaşýar.
Şu ýyl on bäşinji gezek geçirilýän döredijilik forumyna Ermenistandan, Azerbaýjandan, Belarusdan, Gazagystandan, Gyrgyzystandan, Täjigistandan, Türkmenistandan, Özbegistandan we Russiýadan görnükli jemgyýetçilik hem-de sungat işgärleriniň, alymlaryň, medeniýet edaralarynyň, ylym we bilim merkezleriniň ýolbaşçylarynyň, habar beriş serişdeleriniň wekilleriniň 200-den gowragyny bir meýdança jemledi. Munuň özi dostlukly gatnaşyklary has-da berkitmekde, özara tejribe alyşmakda, hyzmatdaşlygyň gerimini giňeltmekde, döredijilik we ylmy ugurlarda gazanylan üstünlikler bilen birek-biregi tanyşdyrmakda uly ähmiýete eýedir.
«TürkmenGazet».
