Eger-de ulgamyň maglumatlary hem-de ýerine ýetirýän hyzmatlary milli çäklerdäki guramalaryňdyr edaralaryň işi, ýurduň döwlet serhediniň çäklerindäki amallar bilen baglanyşykly bolsa, oňa milli «bir penjire» ulgamy diýilýär.
Sebit derejesindäki «bir penjire» ulgamynda milli derejedäki ulgamlaryň birnäçesiniň arasynda maglumat alyş-çalşygy bolup geçýär. Olar sebit derejesindäki kadalaşdyryş talaplaryny berjaý etmäge niýetlenendir. Soňky ýyllarda sebit derejesindäki «bir penjire» ulgamlarynyň meşhurlygy ýylsaýyn artýar. Günorta-Gündogar Aziýa döwletleriniň assosiasiýasy (ASEAN) sebitleýin «bir penjire» ulgamynyň taslamasyny durmuşa geçiren ilkinji ykdysady bileleşik boldy. Soňra «Ýewropa Bileleşiginiň deňiz bir penjiresi» hem-de Ýewraziýa Ykdysady Bileleşiginiň «bir penjire» ulgamynyň taslamasy we beýlekiler işe girizildi.
Türkmenistanda 2019 ― 2025-nji ýyllarda sanly ykdysadyýeti ösdürmegiň Konsepsiýasyna laýyklykda, häzirki wagtda ýurdumyzda halk hojalygynyň ähli pudaklaryny sanlylaşdyrmak we ylmy işläp taýýarlamalary önümçilige ornaşdyrmak boýunça maksatnamalaýyn işler alnyp barylýar. Şunuň bilen baglylykda,
«Türkmenaragatnaşyk» agentligi tarapyndan işe girizilen e.gov.tm diýen bir bitewi Döwlet hyzmatlar hem-de işler portaly hereket edýär.
Bu portal raýatlar we işewürlik üçin döwlet hyzmatlaryny elektron görnüşde ýerine ýetirmäge niýetlenen «bir penjire» ulgamydyr. Onda aragatnaşyk, bilim, saglygy goraýyş, ulag, logistika hem-de gümrük gullugy, jemagat hojalygy, pasport, iş üpjünçligi, maliýe ulgamy, hukuk kömegi, ygtyýarnamalar we beýlekiler boýunça onlaýn hyzmatlardan hem-de ministrlikleriňdir pudaklaýyn dolandyryş edaralarynyň web-saýtlaryndan peýdalanmaga mümkinçilik döredilendir.
Kurbangeldi HANDURDYÝEW,
Türkmen oba hojalyk institutynyň mugallymy.
