23-nji noýabrda türkmen paýtagtynda Täjigistan Respublikasynyň Türkmenistandaky Medeniýet günleriniň açylyş dabarasy boldy. Iki dostlukly döwletiň Baştutanlarynyň başlangyjy bilen geçirilýän bu giň gerimli medeni çäre türkmen-täjik döwletara gatnaşyklarynyň ösdürilmegine möhüm goşant bolar.
Türkmenistanyň Döwlet medeniýet merkeziniň Mukamlar köşgünde Täjigistanyň Medeniýet günleriniň açylyş dabarasy geçirildi. Bu ýere agşamara iki ýurduň medeniýet ulgamynyň ýolbaşçylary, Türkmenistandaky diplomatik wekilhanalaryň, köpçülikleýin habar beriş serişdeleriniň wekilleri, döredijilik işgärleri, paýtagtymyzyň ýaşlary ýygnandylar. Iki döwletiň medeniýet ministrleri foruma gatnaşyjylara we myhmanlara gutlag sözleri bilen ýüzlendiler, döwletara medeni gatnaşyklar üçin aýratyn waka hem-de Türkmenistan bilen Täjigistanyň arasynda dostluk, hyzmatdaşlyk gatnaşyklarynyň ýolunda ýene bir möhüm ädim bolan bu gezekki çäräniň ähmiýetini nygtadylar.
Medeniýet günleriniň maksatnamasy köpöwüşginli bolup, täjik medeniýetiniň we sungatynyň gazananlary hem-de ösüş meýilleri barada giň düşünje almaga mümkinçilik berýär.
