Sazşynas, mugallym, sungaty öwreniş ylymlarynyň doktory, professor, dosent Ýuriý Nikolaýewiç Holopowyň 90 ýyllyk ýubileýi mynasybetli Maýa Kulyýewa adyndaky Türkmen milli konserwatoriýasynda ylmy maslahat geçirildi.
Şeýle ylmy-amaly maslahatlar, sazyň nazaryýeti, taryhy we kompozisiýa hünärleri boýunça dürli bäsleşikler, «Holopowyň saz dünýäsi» atly halkara festiwaly, Ý.N.Holopowyň dürli ýurtlarda işleýän şägirtleriniň gatnaşmagyndaky dürli çäreler häzirki wagtda hem yzygiderli guralýar.
Konserwatoriýadaky Maýa Kulyýewanyň muzeýinde geçirilen bu ylmy maslahatda «Sazyň nazaryýeti» kafedrasynyň uly mugallymlary Şemşat Annagylyjowa, Miwe Saparmyradowa,Ýelena Osipowa, şeýle-de, sazşynaslyk hünäriniň 2-nji ýyl talyby Jeýran Joraýewa we sazşynaslyk hünäriniň 4-nji ýyl talyby Hudaýnazar Baýramow dagylar çykyş etdiler. Maslahatda çykyş edenler Ý.N.Holopowyň ömür ýoly, onuň ýaşan ýyllarynda ýazan ylmy işleri, okuw gollanmalary, makalalary, monografiýalary, dürli ýurtlarda eden ylmy çykyşlary barada giňişleýin gürrüň berdiler. Maslahatyň ahyrynda Ý.N.Holopowa bagyşlanan dokumental film görkezildi. Ol dabara gatnaşyjylarda uly täsir galdyrdy.
Suraý SÄHEDOWA,
Maýa Kulyýewa adyndaky Türkmen milli konserwatoriýasynyň sazşynaslyk hünäriniň 2-nji ýyl talyby.
