Türkmenistanyň wekiliýeti II Hazar ykdysady forumyna gatnaşdy. Bu çäre 5-nji we 6-njy oktýabrda Moskwanyň Skolkowo tehnoparkynda geçirildi. Oňa Russiýanyň premýer-ministri Mihail Mişustin we “Hazar bäşligine” girýän ýurtlaryň ýokary derejeli ýolbaşçylary gatnaşdylar.
5-nji oktýabrda forumyň çäklerinde logistikadan başlap, syýahatçylyk taslamalaryna çenli dürli mowzuklarda tegelek stollar we duşuşyklar geçirildi.
6-njy oktýabrda forumyň çäginde Hazarýaka döwletleriň häkimiýetleriniň wekilleriniň we öňdebaryjy kompaniýalarynyň ýolbaşçylarynyň umumy mejlisi geçirildi. Forumyň dowamynda Hazar sebitindäki söwda-ykdysady, ylmy-tehniki hyzmatdaşlygyň esasy meselelerine seredildi. Esasy ünsüň ulag infrastrukturasy, energetika, daşky gurşawy goramak, şeýle-de sebitara hyzmatdaşlygy we medeni-gumanitar gatnaşyklary ösdürmek boýunça bilelikdäki taslamalara gönükdirildi.
“Işewür Hazar” mejlisine gatnaşyjylar täze şertlerde işewürligi üstünlikli ösdürmegiň ýollary barada pikir alyşdylar, geosyýasy töwekgelçilikleri hem-de olaryň Hazar sebitindäki söwda işlerine täsirini, Hazar ugrunda söwda-senagat edaralarynyň hereketlerini ara alyp maslahatlaşdylar.
Bilelikdäki taslamalaryň we utgaşykly aragatnaşyklaryň ösdürilmegine, sergi-ýarmarka we kongres işleriniň täze sanly mümkinçiliklerine, arbitraž edaralary tarapyndan işewürligiň bähbitleriniň goralmagyna, bilermenleriň hyzmatlarynyň öňe ilerledilmegine garaldy.
Forum ikinji gezek hazarýaka döwletleriň arasyndaky hyzmatdaşlyk meselelerini ara alyp maslahatlaşmak üçin iri meýdança bolup hyzmat eder. Birinji Hazar ykdysady forumy 2019-njy ýylyň awgust aýynda Türkmenistanda geçirildi.
Sylap KULLYÝEW,
Türkmenistanyň DIM-niň Halkara gatnaşyklary institutynyň Halkara ykdysady gatnaşyklary fakultetiniň 1-nji ýyl talyby.
