Şu gün — 23-nji sentýabrda Aşgabat şäheriniň Ruhyýet köşgünde Türkmenistanyň Prezidenti Serdar Berdimuhamedowyň gatnaşmagynda Türkmenistanyň Döwlet Maslahaty geçirildi.
Oňa ýurduň Hökümetiniň we Milli Geňeşiň agzalary, ministrlikleriň, syýasy partiýalaryň, jemgyýetçilik guramalarynyň ýolbaşçylary, welaýatlaryň, etraplaryň, şäherleriň häkimleri, halk maslahatlarynyň agzalary, il sylagly ýaşulular, ýaşlar gatnaşdylar. Ahal welaýatynda «Türkmeniň ak öýi» binasyna, Balkan, Daşoguz, Lebap we Mary welaýatlarynyň Ruhyýet köşklerine ýygnanan ýurdumyzyň sebitleriniň wekilleri bolsa maslahata sanly ulgam arkaly goşuldylar.
Türkmenistanyň Prezidenti hemmeleri ýurduň şanly baýramy bolan Garaşsyzlygymyzyň ýetip gelýän senesi bilen tüýs ýürekden gutlap, Türkmenistanyň Döwlet Maslahatyny açyk diýip yglan etdi. Döwlet senasy ýaňlanandan soňra, döwlet Baştutany umumymilli maslahata gatnaşyjylaryň öňünde maksatnamalaýyn çykyşyna başlady.
Maslahatyň gün tertibine laýyklykda, onuň dowamynda Garaşsyzlygyň 31 ýyllygyna bagyşlanan çykyşlar diňlenildi. Türkmenistanyň gazanan taryhy üstünlikleriniň jemleri jemlenildi. Garaşsyzlyk ýyllarynda geçen ösüş ýoly seljerilip, geljek üçin wezipeler, ileri tutulýan ugurlar kesgitlenildi. Şeýle-de, maslahatyň ahyrynda döwlet sylaglaryna, hormatly atlara mynasyp bolan raýatlary sylaglamak üçin möhüm resminamalara gol çekildi.
Türkmenistanyň Döwlet Maslahaty ýokary netijelere beslenip jemlenildi we täze-täze maksatlara badalga berdi.
Selbi MEREDOWA,
Türkmen oba hojalyk institutynyň mugallymy.
