1994-nji ýylda BMG-niň Baş Assambleýasy A / RES / 49/114 belgili karary bilen 16-njy sentýabry «Ozon gatlagyny goramagyň halkara güni» diýip yglan etdi.
Bu günüň senesi, Ozon gatlagyny ýoklaýan maddalar boýunça Monreal teswirnamasyna gol çekilen gününi – 16-njy sentýabry hatyralamak üçin saýlanylandyr. Çünki BMG agza döwletler Monreal teswirnamasynyň maksatlaryna we wezipelerine laýyklykda belli çäreleri öňe sürmek üçin bu Halkara gününi bagyşlamaga çagyryldy. Bu çagyryş bolsa milleteler bileleşigine girýän döwletler tarapyndan biragyzdan kabul edildi.
Biziň ýurdumyz hem 1992-nji ýylyň 2-nji martynda BMG-niň agzalygyna kabul edilenden soň, bu abraýly guramanyň 1985-nji ýylyň 22-nji martynda 28 ýurt tarapyndan kabul edilip gol çekilen Ozon gatlagyny goramak baradaky Wena konwensiýasyna 1993-nji ýylda, 1987-nji ýylyň 16-njy sentýabrynda tassyklan Ozon gatlagyny ýoklaýan maddalar boýunça Monreal teswirnamasyna bolsa 1994-nji ýylda goşuldy.
2007-nji ýylyň 16-njy sentýabrynda Ozon gatlagynyny goramaklygyň halkara gününiň bütindünýä jemgyýetiligi tarapyndan giňden dabaralandyrylan gününde Türkmenistan ozon gatlagyny goramak boýunça uly goşantlary üçin halkara sertifikatyna mynasyp boldy.
Häzirki wagta çenli BMG-niň ozon gatlagyny goramak boýunça Wena konwensiýasyna ozony dargadyjy maddalar boýunça Monreal teswirnamasy iň şowly halkara ylalaşyklarynyň biri boldy. Asmanymyzy halas ediň: özüňizi goraň, ozon gatlagyny goraň!
Jumamyrat GUWANJOW,
S.A.Nyýazow adyndaky TOHU-nyň Türkmenabat agrosenagat orta hünär okuw mekdebiniň Gidromeliorasiýa hünäriniň 206-njy toparynyň talyby.
