15-nji sentýabrda hormatly Prezidentimiz Serdar Berdimuhamedow Şanhaý Hyzmatdaşlyk Guramasyna agza döwletleriň Baştutanlarynyň Geňeşine hormatly myhman hökmünde gatnaşmak maksady bilen, Özbegistanyň Samarkant şäherine geldi. Munuň özi hormatly Prezidentimiziň iň ýokary döwlet wezipesinde bu dostlukly ýurda amala aşyrýan ikinji saparydyr.
Iki günlük iş saparynyň birinji gününiň maksatnamasynda döwlet Baştutanymyz Samarkant sammitine gatnaşýan käbir ýurtlaryň Liderleri hem-de Şanhaý Hyzmatdaşlyk Guramasynyň Baş sekretary bilen ikitaraplaýyn duşuşyklary geçirdi. Şeýle-de hormatly Prezidentimiz Özbegistanyň ilkinji Prezidenti Yslam Karimowy hatyralap, onuň mawzoleýine gül dessesini goýdy. Günüň ikinji ýarymynda wekiliýet Baştutanlary bilelikde Hormatly myhmanlar seýilgähinde nahal oturdyp, «Baky şäher» medeni-etnografik toplumyna baryp gördüler.
«TürkmenGazet».
