Şu günler Awstriýanyň Oberwarte şäherinde dzýudo boýunça Ýewropanyň açyk çempionaty geçirilýär. Oňa goňşy yklymyň öz wekillerinden başga-da, beýleki yklymlardan ýygyndylar, şol sanda türkmenistanly dzýudoçylaryň hem 28-si gatnaşýar. Bu barada «Türkmenistan» gazeti habar berýãr.
Ýakynda bolsa çempionatdan ilkinji hoş habarlar geldi. Has takygy, türkmen dzýudoçylarynyň ikisi bu abraýly ýaryşyň çempiony bolmagy başardylar.
Ilkinji hoş habar 60 kilograma çenli agram derejesinde çykyş eden ildeşimiz Hakberdi Jumaýew bilen baglydyr. Ol ýaryşyň deslapky tapgyrynda fransiýaly Ýohan Russelden, wengriýaly Marton Andrasiden we germaniýaly Maksimilian Standkeden üstün çykdy. Ýarym finalda gazagystanly Dauren Sýukenowy ýeňen ildeşimiz altyn medal ugrundaky tutluşykda fransiýaly Riçard Wergnesden rüstem geldi. Şeýlelikde, Hakberdi Jumaýew bu agram derejesinde hormat münberiniň iň ýokary basgançagyny eýeledi. Türgen geçen aýda Türkiýede geçirilen Yslam raýdaşlygy oýunlarynda hem 60 kilograma çenli agram derejesinde ýaryşyp, bürünç medala mynasyp bolupdy.
Başga bir ildeşimiz Hekim Agamämmedow bolsa Ýewropa çempionatyna 66 kilograma çenli agram derejesinde gatnaşyp, altyn medala mynasyp boldy. Deslapky tapgyrda fransiýaly Seýma Lueti, slowakiýaly Mateýem Polýaky we niderlandly Iwo Werhosteri ýeňen ildeşimiz ýarym finalda we finalda gazagystanly dzýudoçylar bilen tutluşdy. Has takygy, ol ýarym finalda Aýbolar Ystybaýy, finalda bolsa Ýermek Amangeldini ýeňdi. Hekim hem Yslam raýdaşlygy oýunlarynda bürünç medaly eýeläpdi.
Ýewropa çempionatynda beýleki ildeşlerimiziň hem ýokary derejede çykyş edip, medallara mynasyp bolmagyny arzuw edýäris.
