31-nji awgustda paýtagtymyzda hormatly Prezidentimiz Serdar Berdimuhamedowyň tabşyrygy boýunça ýakynda geçirilen iri halkara ýaryşlarda — Russiýa Federasiýasynyň Wladiwostok şäherinde geçirilen «Aziýanyň çagalary» atly VII halkara sport oýunlarynda hem-de Türkiýe Respublikasynyň Konýa şäherinde guralan V Yslam raýdaşlygy oýunlarynda üstünlikli çykyş edip, baýrakly orunlara mynasyp bolan türgenleri sylaglamak dabarasy boldy.
Olimpiýa şäherçesindäki “Sport” myhmanhanasynyň mejlisler zalynda geçirilen dabaraly çärä Hökümet agzalary, Türkmenistanyň Milli Geňeşiniň Halk Maslahatynyň hem-de Mejlisiniň, ministrlikleriň we pudaklaýyn dolandyryş edaralarynyň, jemgyýetçilik guramalarynyň, ýokary okuw mekdepleriniň, köpçülikleýin habar beriş serişdeleriniň ýolbaşçylary hem-de wekilleri gatnaşdylar.
Mälim bolşy ýaly, Wladiwostok şäherinde Türkmenistanyň toparyna 62 türgen wekilçilik edip, olar sportuň dokuz görnüşi — basketbol 3×3, boks, kuraş göreşi, ýeňil atletika, stoluň üstünde oýnalýan tennis, suwda ýüzmek, sambo, sport göreşi (grek-rim hem-de erkin göreş) we ýaýdan ok atmak boýunça bäsleşdiler hem-de dürli derejeli medallaryň 16-syny gazandylar.
Konýada türkmen türgenleri jemi 23 medal gazandylar. Şolardan 4-si altyn, 6-sy kümüş we 13-si bürünç medallardyr.
Ýygnananlaryň şowhunly el çarpyşmalary astynda baýrakly orunlary eýelän türgenlere hormatly Prezidentimiziň adyndan sowgatlar, şeýle hem Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasyndan ýörite sport egin-eşikleri dabaraly ýagdaýda gowşuryldy.
«TürkmenGazet».
