Awgust aýynda ýurdumyzyň günbatar sebitinde, şol sanda «Awaza» milli syýahatçylyk zolagynda iri çärelerdir dabaralaryň birnäçesi geçiriler. Olara görülýän taýýarlyk işleri barada şu gün sanly ulgam arkaly geçirilen Hökümetiň giňişleýin mejlisinde degişli ýolbaşçylaryň hasabatlarynda aýdyldy.
Hususan-da, 1-nji awgustda Awazada dynç alýanlar üçin gurlan «Rowaç» kottejler toplumynyň açylyş dabarasy; 3-nji awgustda Russiýa Federasiýasynda awtomobil sportunyň ralli-reýd görnüşi boýunça geçirilen «Ýüpek Ýoly — 2022» atly halkara ýaryşda, Özbegistanyň Daşkent şäherinde ýetginjekleriň we ýaşlaryň arasynda agyr atletika boýunça geçirilen Aziýa çempionatynda baýrakly orunlary eýelän türgenlerimizi sylaglamak dabarasy; 8-nji awgustda Balkan welaýatyndaky Garabogazköl aýlagynyň üstünden guruljak täze köpriniň düýbüni tutmak dabarasy; 15-16-njy awgustda bolsa deňze çykalgasy bolmadyk ösüp barýan döwletleriň ulag ministrleriniň halkara maslahaty ýaly dürli görnüşli çäreleri geçirmek göz öňünde tutulýar.
Geçen ýyl ýurdumyzyň etraplarynyň arasynda ähli görkezijiler boýunça ýeňiji bolan Balkan welaýatynyň Esenguly etrabynda gurlan «Arkadagyň nesilleri» atly döwrebap çagalar dynç alyş merkeziniň 5-nji awgustda geçiriljek açylyş dabarasy we 12-nji awgustda «Awaza» milli syýahatçylyk zolagynda Hazar deňziniň güni mynasybetli guraljak maslahat hem köpöwüşginli çäreleriň üstüni ýetirer.
«TürkmenGazet».
