“Türkmenistan” gazetinde “Türkmenistanyň “Ene mähri” diýen hormatly adynyň Düzgünnamasyna üýtgetme we goşmaça girizmek hakynda” Türkmenistanyň Kanuny çap edildi.
Kanunyň 4-nji bendi mundan beýläk şu görnüşde beýan ediler: “4. Türkmenistanyň “Ene mähri” diýen hormatly adyny dakmaga hödürlemek hödürlenilýän enäniň hakyky ýaşaýan ýeri boýunça ýerine ýetiriji häkimiýetiň ýerli edaralary tarapyndan amala aşyrylýar. Enäniň ýaşaýan ýeri Türkmenistanyň Raýat kodeksine laýyklykda kesgitlenilýär.”
Şeýle hem Kanunyň 7-nji bendine ýörite tesim goşuldy. Oňa laýyklykda, Türkmenistanyň “Ene mähri” diýen hormatly adyna mynasyp bolan ene ölen ýagdaýynda, onuň maşgala agzalary üçin şu bendiň birinji tesiminde görkezilen suwdan, gazdan, elektrik energiýasyndan we ýaşaýyş jaý-jemagat hyzmatlaryndan mugt peýdalanmaga bolan hukuk enäniň iň soňky çagasy kämillik ýaşyna ýetýänçä saklanyp galýar.
