Şu gün — 1-nji iýunda Türkmenistanyň Daşary işler ministrliginiň Halkara gatnaşyklary institutynda Bilim ministrliginiň hem-de Magtymguly adyndaky Ýaşlar guramasynyň Merkezi Geňeşiniň bilelikde guramagynda ýurdumyzyň ýokary okuw mekdepleriniň arasynda geçirilýän «Talyp joşguny – 2022» atly döredijilik festiwaly dabaraly ýagdaýda geçirildi. Döredijilik festiwalyna institutyň bagtyýar talyp ýaşlary işjeň gatnaşdylar.
«Talyp joşguny — 2022» döredijilik festiwalynyň çykyşlary Gahryman Arkadagymyzyň jöwher paýhasyndan dörän kitaplarynyň esasynda taýýarlanyldy. Döredijilik festiwal edebi-sazly kompozisiýa, taryhda uly yz goýan şahsyýetlerimiz barada taryhy sahna, çeper okaýyş, institutyň talyp gyzlarynyň taýýarlan «Aşyk zergär» atly tansy, degişme sahnasy, halk döredijiliginden bir parça şeýle-de, institutymyzyň höwesjeň talyplarynyň ýerine ýetirmeginde Watanymyzyň ösüşlerini wasp edýän aýdym bilen utgaşyp, şatlyk-şowhuna beslendi.
Bägül MERDANOWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 2-nji ýyl talyby.
