21-nji maýda paýtagtymyzda açylan «Türkmen teatr sungaty» atly festiwalyň dabaralary dowam edýär. Türkmenistanyň Medeniýet ministrligi tarapyndan guralan sahna sungatynyň forumy ýurdumyzyň welaýatlarynyň hem-de paýtagtymyzyň teatr toparlaryny bir ýere jemledi.
Festiwalyň dowamynda ýurdumyzyň welaýatlaryndaky we paýtagtymyzdaky teatrlaryň artistleriniň taýýarlan sahna oýunlarynyň 10-synyň görkezilmegi meýilleşdirildi. Eýýäm olaryň köpüsi sahna muşdaklarynyň söýgüsini gazandy. Ilkinji gezek görkezilýän sahna oýunlary ýurdumyzyň medeniýet we sungat ussatlarynyň festiwala ýokary taýýarlyk görendiginiň subutnamasydyr.
Festiwal 25-nji maýa çenli dowam eder. Onuň çäklerinde paýtagtymyzdaky teatrlarda dürli sahna oýunlary görkeziler, teatr ýolbaşçylarynyň hem-de döredijilik işgärleriniň gatnaşmagynda iş maslahatlary geçiriler.
«TürkmenGazet».
