2022-nji ýylyň 17-nji maýynda Türkmenistanyň Daşary işler ministrliginiň Halkara gatnaşyklary institutynda Gahryman Arkadagymyz Gurbanguly Berdimuhamedowyň «Ömrümiň manysy» atly kitabynyň rus dilindäki neşiriniň tanyşdyrylyş dabarasy boldy.
Dabara Daşary işler ministrliginiň hünärmenleri, daşary ýurtlaryň we halkara guramalaryň Türkmenistandaky hemişelik wekilhanalarynyň ýolbaşçylary, ýurdumyzyň köpçülikleýin habar beriş serişdeleriniň wekilleri, institutymyzyň professor-mugallymlary, talyp ýaşlary gatnaşdylar.
Tanyşdyrylyş dabarasynyň dowamynda Russiýa Federasiýasynyň Türkmenistandaky Adatdan daşary we Doly ygtyýarly Ilçisi, Birleşen Milletler Guramasynyň Baş sekretarynyň Merkezi Aziýa boýunça Ýörite wekili, BMG-niň Merkezi Aziýa üçin öňüni alyş diplomatiýasy boýunça Sebit merkeziniň baştutany, Özbegistan Respublikasynyň Türkmenistandaky Adatdan daşary we Doly ygtyýarly ilçisi, Belarus Respublikasynyň Türkmenistandaky Adatdan daşary we Doly ygtyýarly Ilçisi, Täjigistan Respublikasynyň Türkmenistandaky Adatdan daşary we Doly ygtyýarly Ilçisi çykyş etdi. Olar çykyşlarynda «Ömrümiň manysy» atly kitabyň rus diline terjime edilmeginiň russiýaly we rus dilini bilýän okyjylara Gahryman Arkadagymyzyň ömür ýoly bilen ýakyndan tanyşmaga ýardam etjekdigini aýratyn nygtadylar.
Şeýle-de dabaranyň dowamynda Halkara ynsanperwer ylymlary we ösüş uniwersitetiniň rektory, Türkmenistanyň Daşary işler ministrliginiň Halkara gatnaşyklary institutynyň professor-mugallymlary hem çykyş etdiler. Çykyşlarda Gahryman Arkadagymyzyň «Ömrümiň manysy» atly kitabynyň rus dilindäki neşiriniň derwaýyslygy barada giňişleýin durlup geçildi.
Miwe NABATOWA,
Türkmenistanyň Daşary işler ministrliginiň Halkara gatnaşyklary institutynyň mugallymy.
Surata düşüren Taňryberdi MYRATLYÝEW,
Institutyň Žurnalistikanyň nazaryýeti we amalyýeti kafedrasynyň uly laboranty.
