Şu gün — 29-njy aprel ady rowaýata öwrülen tennisçi Andrea Agassiniň doglan günüdir.
Ady hatda tennis bilen gyzyklanmaýanlara-da tanyş bolan meşhur türgen 1970-nji ýylda ABŞ-nyň Newada ştatynyň Las-Wegas şäherinde, eýranly migrantyň maşgalasynda dünýä inýär. Ýeri gelende, Adreanyň kakasy Emmanueliň hem boks bilen meşgullanýan türgen bolandygyny, iki gezek tomusky olimpiýa oýunlaryna gatnaşandygyny bellemek gerek.
Andrea tennis bilen çagalyk ýyllaryndan meşgullanyp başlaýar. 13 ýaşynda kakasy ony şol döwrüň iň gowularynyň biri bolan Breýdentondaky Nik Bolletýeriň tennsi akademiýasyna ýerleşdirýär. 14 ýaşynda özüniň ilkinji baýragyna — ýetginjekleriň arasynda ABŞ-nyň çempionlyk titulyna eýe bolan Andrea Agassi 15 ýaşynyň içindekä professional karýerasyna badalga berýär. 17 ýaşynda ol professional karýerasynda ilkinji gezek finala çykmagy başarýar. Heniz professional karýerasyna başlanyna ýaňy iki ýyl bolanda ol bir ýylyň dowamynda 6 Gran-pri turniriniň baş baýragyna mynasyp bolýar hem-de iki «Uly tuwulga» ýaryşynyň ýarym finalyna çykmagy başarýar. Şondan soň ussat türgeniň ýeňişli ýoly başlanýar. Ol umumylykda, 60 kuboga (şolardan 8-si «uly tuwulga») mynasyp bolýar. Professional karýerasynyň dowamynda 1144 oýun geçirip, şolaryň 870-sinde ýeňiş gazanýar. Şeýle-de Andrea Agassi «uly tuwulgalaryň» dördüsinde hem-de olimpiýa oýunlarynda ýeňiş gazanan tennsiçi hökmünde taryha girýär.
Meşhur tennisçi öz karýerasyny 2006-njy ýylda tamamlaýar. Ol bütin karýerasynyň dowamynda diňe ýaryşlardaky çykyşlarynyň hasabyna 31 million 152 müň amerikan dollary möçberinde pul baýragyny gazanýar.
Toýly MYRATGELDIÝEW,
Türkmenistanyň Daşary işler ministrliginiň Halkara gatnaşyklary institutynyň talyby.
