ÝAGYŞ
Bir düşnüksiz howsalasy bar ýaly,
Indi ençe gündür ýagýar ol diňmän.
Ýa derde sataşdy,
ýa-da ýüregne
Yşkdan uçgun düşdi gözi deý iňňäň.
Ýagyş ýagýar, suw-sil edip ýollary,
Kimleň şähdi açyk, kimler darykýar.
Näçe adam öýlerine howluksa,
Ýene-de şonçasy daşaryk çykýar.
Her kimiň kalbynda çäksiz tolgunma,
Hoş sözler aýdylýar, ötülýär hata.
Saýawanly gyzjagazny göterip,
Hanha, gidip barýar nowjuwan ata.
Jemläp bir damjada müňlerçe syry
Ýagyş bagt paýlaýar töwerek-daşa.
Häzir bir-biregi küýsän aşyklaň
Duşuşygy has lezzetli, başgaça.
Ýagýar hetden aşyp,
sygman adata,
Bu howsala ýönekeý däl, kiçeň däl.
Mazaly ezilen baglar Gün çyksa,
Ýagşyň hikmetini dünýä güjeňlär.
ÝAG, GUSSAŇ MELHEMI!
Ýagyş ýagýar, uçmah ysly damjalar
Ýagýan ýaly ýere däl-de, ýüregme.
Bilmen, hyýallarym barýar hanjaga,
«Köne ýazgylary» goýup deregne.
Ýag, gussaň melhemi, yşkyň hemdemi,
Poslan göwünleri päklige ýetir.
Senden – umyt,
Razy, galsa mendenem
Ýaşaýşy beýgeltjek ýekeje setir.
Tebigat asylky keşbine girse,
Duýgular düýpgöter barýar özgerip.
Adam ýaşamaly giçde ýa irde
Erkini olaryň eline berip.
ÝAGŞA MEŇZEŞ…
Kän arzuw ederdim öňler
Hemra edinip hyýaly.
«Meniň saýlajak ýigidim
Bolsun diýip ýagyş ýaly».
Ýagyş deýin joşup duran
Duýgy bolsun gursagyna.
Güldürip bilsin ýüzümi
Gama batan pursadymda.
Söýsün meni çyny bilen,
Küýsetmesin özge gujak.
Kä şanyma şygyr ýazsa,
Käte çalsyn dutar, gyjak.
Ähli ýerde, hemme wagt
Açyp bilsin ýüregimi.
Çawuş çaksyn gyz-gelinleň
Tutmajagny deregimi.
Gözlerime bakanynda,
Gitsin kalbym joşup, jigläp.
Meň ýanymda agras däl-de,
Bolsun biraz dälimçigräk.
Asudaka, gaharlyka,
Şatlananda, söýeninde,
«Sen meniň ömrümiň örki»
Her deminde diýeninde,
Daglar-daşlar aman diläp,
Kalbym ýaly gitsin eräp.
Söýgimize ganat berjek
Tapsyn iň ajaýyp sebäp.
Käteler tötänden ýa-da
Göwni gidip baksa biri.
Müň mertebe toba etsin
Arkasynda bar diýp şiri.
…Sataşdym şeýle ýigide
Gursagy aýdym-şygyrly.
Bagtym bolup gelen ýigit
Hem-ä alçak, hem-de syrly.
Käte ot deý çabyraýar,
Birden buz deý barýar sowap.
Ýöne ýeke ýylgyryşy
Sowallarňa bolýar jogap.
Oýlanmaga mejbur edýär,
Hiç bir zadyň soňun saýman.
Tutup bormy közi elde,
A suwy ýüzünde aýnaň?!
Gurbanjemal ANNAKOWA.
