«Türkmenistan» gazetinde habar berlişi ýaly, geçen şenbe güni «Türkmennebitönümleri» baş müdirliginiň «Ahal» futbol topary hem AFK-nyň Çempionlar ligasynyň toparçalaýyn duşuşyklaryna gatnaşmak üçin Saud Arabystanyna ugrady.
Türkmenistanyň wise-çempionynyň tälimçiler we futbolçylar düzümi Farap gümrük nokady arkaly Özbegistana geçdi. Bu ýerden Daşkent şäherine baran ildeşlerimiz goňşy döwletiň paýtagtyndan Saud Arabystanyna ýola düşdi. Olar dostlukly döwletde mähirli garşylandy.
AFK-nyň Çempionlar ligasynyň Günbatar sebitiniň duşuşyklary 7-nji aprelde badalga alar. Has takygy, «Ahal» şol günden 26-njy aprele çenli toparçada üç garşydaşy bilen alty duşuşyk geçirer.
«Ahal» Günbatar zolakda ýerleşýän «C» toparçanyň wekilidir. Ildeşlerimiz toparçadan üstünlikli çykyp, ýaryşy 1/8 finallarda dowam etdirmek üçin Eýranyň «Fulad», BAE-niň «Şabab al-Ahli» we Kataryň «Al-Garafa» toparlary bilen güýç synanyşar.
«TürkmenGazet».
