Dünýäniň dürli ýurtlarynda, esasan hem Aziýa sebitlerinde 21-22-nji mart – Halkara Nowruz güni ýokary ruhubelentlikde bellenilýär. Geliň, bu baýramçylygyň dünýäniň dürli ýurtlarynda belleniliş aýratynlyklary bilen tanyş bolalyň!
Eýran. Eýranda Nowruz baýramy üçin 13 günläp taýýarlyk görülýär. Halkyň däp-dessuryna görä bu baýramda ot ýakylyp, onuň üstünden öz arzuw umytlaryň aýdylyp bökülýär. Baýram mynasybetli ýörite dabara gularyp, onda milli saz gurallar çalynýar, halk aýdymlary aýdylýar.
***
Özbegistan. Özbek halkynyň däbine görä Nowruz baýramynda öýe ilkinji gelen myhman hem-de onuň häsiýeti ol öýe mahsus diýlip düşünilýär. Baýramçylyk gününde horaz uruşdyrmak, at çapyşyklaryny geçirmek Özbegistanda has meşhurdyr.
***
Gazagystan. Gazagystanda bolsa, ýörite “Nowruz köjesi” diýlip atlandyrylýan tagam taýýarlanyp, oňa 7 sany önüm goşýarlar. Halkyň ynanjyna görä olaryň her biri gowy häsiýetleriň, alamatlary hasaplanýar. Bu günde ýurduň ähli ýerlerinde konsertler, sport ýaryşlary, gazak göreşleri, at çapyşyklar guralýar.
***
Türkiýe. Türkiýede Nowruz baýramy 22-23-nji martda bellenilýär. Ähli gowy ýörelgelere eýerilip, birek-birege arpa dänejikleri we teňňeleri sowgat bermek türkleriň däbi hasaplanýar. Şol güni hemmeler ir bilen täze geýimlerini geýip, öten-geçenleri zyýarat edýärler. Agşam bolsa, ýakyn dost-ýarlaryň bilen bilelikde baýramçylyk saçagynyň başynda ýygnanyşyp, daňdana çenli baýramçylyk bellenilýär.
***
Azerbaýjan. Azerbeýjanda Nowruz baýramynyň ilkinji güni birek-birege Täze ýyl gutlaglary aýdylýar. Bu halkyň däp-dessuryna görä baýramçylyk saçagynda 7 görnüşli tagam taýýarlanylýar. Baýramçylyk güni adatça daşky gapylar açyk goýulýar. Beýle edilmeginiň manysy öýe gelýän myhmanlary myhmansöýerlik bilen garşy alynýandygynyň alamaty hasaplanýar.
***
Türkmenistan. Eziz ýurdumyz Türkmenistanda hem bu baýramçylyk ýokary ruhubelentlik bilen agzybirlikde bellenilýär. Nowruz ýaýlasynda baýramçylyk dabaralary geçirilip, milli oýunlar guralýar. Türkmenlerde baýramçylyk güni ýakyn goňşularyňy bir gazanyň başyna üýşürip, “Äşe-Patmanyň” aşy hasaplanýan semeni gaýnadylýar. Şeýle-de milli oýunlar oýnalýar, hiňňildik uçulýar we “Şaman ody” ýakylyp, ýagşy arzuwlar bilen onuň üstünden bökülýär.
Aýlar ATAJYKOWA,
Türkmenistanyň Daşary işler ministrliginiň Halkara gatnaşyklary institutynyň halkara žurnalistikasy fakultetiniň II ýyl talyby.
