10-njy martda Türkmenistanyň Daşary işler ministrliginiň Halkara gatnaşyklary institutynda Ýaş diplomatlaryň mekdebi tarapyndan guralýan «Parahatçylygyň ýaş çaparlary» atly akyl-paýhas bäsleşiginiň I saýlama tapgyrynyň 5-nji oýny geçirildi. Bäsleşigiň nobatdaky oýny «Horezmşalar döwletiniň daşary syýasaty we diplomatik däpleri» atly tema bagyşlanyldy.
Akyl-paýhas bäsleşiginiň I saýlama tapgyrynyň 5-nji oýnuna Aşgabat şäheriniň dil derslerini çuňlaşdyryp öwredýän 87-nji ýöriteleşdirilen orta mekdebiniň, Aşgabat şäheriniň Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň hem-de Aşgabat şäherindäki 16-njy orta mekdebiň okuwçylary gatnaşdylar.
Bu bäsleşige «Pähimdarlar geňeşiniň» agzalary hökmünde Daşary işler ministrliginiň Ýewropa ýurtlary bölüminiň geňeşçisi, Türkmenistanyň Adatdan daşary we Doly ygtyýarly Ilçisi Nurberdi Amanmyradow, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň alym kätibi, taryh ylymlarynyň kandidaty Kakajan Janbekow hem-de Türkmenistanyň YA-nyň Taryh we arheologiýa institutynyň baş ylmy işgäri, taryh ylymlarynyň kandidaty Ata Nuryýew dagylar adalatly eminlik etdiler. Bäsleşigiň dowamynda ýurdumyzyň teatrlarynyň ussat artistleri Horezmşalar döwletine degişli taryhy pursatlary sahnalaşdyrdylar.
Akyl-paýhas bäsleşiginiň I saýlama tapgyrynyň 5-nji oýnunda emin agzalarynyň gelen netijesine görä, Aşgabat şäheriniň Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 11-nji synp okuwçylary Arazjemal Öwezowa hem-de Kadyrmyrat Öwezgylyjow ýeňijiler diýip yglan edildi. Bäsleşikde ýeňiji bolan we oňa gatnaşan okuwçylara Magtymguly adyndaky Ýaşlar guramasynyň Merkezi Geňeşi, şeýle-de institutymyz tarapyndan degişli şahadatnamalar we hemaýatkärlerden gymmat bahaly sowgatlar gowşuryldy.
«Parahatçylygyň ýaş çaparlary» akyl-paýhas bäsleşiginiň I saýlama tapgyrynyň 5-nji oýnuna Magtymguly adyndaky Ýaşlar guramasynyň Merkezi Geňeşi, Milli ýaý atyjylyk federasiýasy, Senagatçylar we telekeçiler birleşmesi, «Abadan haly» açyk görnüşli paýdarlar jemgyýeti, «Aýdyň gijeler» hojalyk jemgyýeti, «Täç Hil» we «Ýedi dogan» hususy kärhanalary hem-de «Muhammet Balkan» hojalyk jemgyýeti hemaýatkärlik etdiler. «Parahatçylygyň ýaş çaparlary» akyl-paýhas bäsleşiginiň I saýlama tapgyrynyň 5-nji oýny «Miras» teleýaýlymy bilen TDIM-niň Halkara gatnaşyklary institutynyň okuw studiýasy tarapyndan bilelikde ýazgy edildi.
Nowruz KURBANOWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň talyby.
