Ýüregimi paralama!
Ýüregimi paralama,
Alsam beter ar alaryn!
Tüýt-müýt ederin özüňi,
Bitmez soňra ýaralaryň.
Degme meniň arzuwlarma,
Gülme olaryň üstünden.
Seň ýeriň däl, oňa barma,
Pikirleňden kän üstün men.
Salma meni kapasaňa,
Çyzyklama töweregmi.
Bilmen näme bolýar saňa,
Näme doldurar geregňi?!
Erkinlik göwnümi tapar,
Ýogsam, solup-saralaryn.
Duýdurýan iň soňky sapar,
Ýüregimi paralama!
Söz
Men saňa bir zat diýeýin,
Menden gaty görme ýöne.
Düşün ynanyp bilmerin,
Meň ýanymda ýörmeýäne.
Men saňa bir zat diýeýin,
Jogap bermäni diňleseň.
Pyşyrdym gulagňa eltip,
Boýumy boýňa deňlesem.
Men saňa bir zat diýeýin,
Galmasa ganyň basyşy.
Men söýgüm bilen bezäýin,
Onsuzam owadan gyşy.
Dur, dursana, alňasama,
Yşky lybas deý geýeýin.
Sen hiç kime aýtmasaň-a,
Men saňa bir söz diýeýin!
Aýdylmadyk arzuw
Gülleriň göwni galypdyr,
Açylyp ýetişip bilmän,
Yşk höwese garylypdyr,
Alawlap tutaşyp bilmän.
Söýgüňem reňki saralar,
Aýdylmadyk sözlerimde.
Geler-de onsaň ar alar,
Gussa daman gözlerimden.
Sylag-sarpaňa mähetdel,
Göwnüm gitdi görmegiňe.
Görünse-de birgeňsi del,
Aýdym bolup ýörme diňe.
Goşgy ýa-da erteki bol,
Kalp sedam, ýa yşk sesi bol,
Gelneje bolaý, jigiňe,
Sen arzuwmyň ertesi bol!
Nirde, hany köňül guşy?!
Tükäp barýar kanagatym.
Ýörär ýaly ýer galypdyr,
Yşk yzynda taýak atym.
Dat edeýin, ýet ahyma,
Yşkyň gözleri kör eken.
Kakampisint görkli ýigit,
Ejeme gerek köreken!
Ogulnur PIRJIKOWA,
Türkmen döwlet maliýe institutynyň talyby.
