Häzirki wagtda döwrebap bilim ulgamyny ösdürmek boýunça toplumlaýyn işler alnyp barylýar. Bilim ulgamynyň kanunçylyk-hukuk binýady kämilleşdirilýär, bu işde özara bähbitli halkara hyzmatdaşlyklary ösdürilýär. 19-njy aprelde Ýagşygeldi Kakaýew adyndaky Halkara nebit we gaz uniwersitetinde ýurdumyzyň we daşary ýurtlaryň ýokary okuw mekdepleriniň talyplarynyň arasynda I Halkara açyk informatika internet olimpiadasynyň ýokary derejede geçirilmegi munuň aýdyň subutnamasydyr.
Türkmen ýaşlarynyň dünýä derejesinde geçirilýän bäsleşiklere gatnaşyp, üstünlikli çykyş etmegi, şeýle-de halkara olimpiadalaryň yzygiderli ýagdaýda Türkmenistanda geçirilmegi buýsandyryjy ýagdaýdyr. Munuň özi daşary ýurtlaryň abraýly ýokary okuw mekdepleridir iri ylym-bilim merkezleri bilen hyzmatdaşlygyň has-da berkeýändigini alamatlandyrýar.
Onlaýn bäsleşikleri geçirmek üçin ýörite döredilen «Moodle» platformasy arkaly guralan bu halkara olimpiada ýurdumyzyň ýokary okuw mekdeplerinden talyp ýaşlaryň 181-si, şeýle-de daşary ýurtlardan — Germaniýanyň, Wengriýanyň, Awstriýanyň, Koreýa Respublikasynyň, Rumyniýanyň, Malaýziýanyň, Hytaýyň, Russiýanyň, Belarusyň, Gazagystanyň, Gyrgyz Respublikasynyň, Azerbaýjanyň, Ermenistanyň, Russiýa Federasiýasynyň Tatarystan hem Başgyrdystan Respublikalarynyň, Özbegistanyň, Täjigistanyň 50-den gowrak ýokary okuw mekdeplerinden talyplaryň 270-si gatnaşdy.
Bu halkara bäsleşikde talyplar 180 minudyň dowamynda 10 ýumşuň çözgüdini tapmaly boldular. Toplan utuklarynyň jemi boýunça ýeňijiler kesgitlenildi. Netijede, oňa gatnaşyjylaryň 9-sy 1-nji, 51-si 2-nji, 104-si bolsa 3-nji orunlary eýelediler. Ýeňijiler 1-nji, 2-nji we 3-nji derejeli diplomlar bilen sylaglanyldy.
Dürli AGAÝEWA,
Ýagşygeldi Kakaýew adyndaky Halkara nebit we gaz uniwersitetiniň mugallymy.
