Bu akwarium Germaniýanyň paýtagty Berlin şäherindäki bäş ýyldyzly myhmanhanalaryň birinde ýerleşýär. Akwaruim dünýäde silindr görnüşindäki iň uly akwariumdyr. Beýikligi 25 metr, diametri bolsa 11 metr bolan akwarium 1 million litr deňiz suwy bilen doldurylandyr.
Onda derýalardan, ummanlardan we köllerden getirilen balyklaryň 2600-den gowragy we beýleki deňiz jandarlarynyň, suwotularyň ençemesi bardyr. Akwariumyň gurluşy barada aýdylanda, ol ýörite akril aýnasyndan edilendir. Bu material ýokary basyşa çydamly bolup, öz-özünden ýagtylyk bermäge ukyplydyr.
Akwarium aýna liftiň daşyna edilendir. Şonuň üçinem bu ýere gelýänler balyklaryň täsin hereketlerini, deňiz dünýäsiniň ajaýyplyklaryny synlamaga mümkinçilik alýarlar. Suwa çümüjiler balyklary iýmitlendirmek üçin akwariumyň has çuňluklaryna aralaşmaly bolýarlar.
Baýramgeldi REJEPOW,
Türkmenistanyň Döwlet energetika institutynyň 1-nji ýyl talyby.
