Ýurdumyzyň ýaş nesli hakyndaky alada hormatly Prezidentimiziň durmuşa geçirýän syýasatynyň ileri tutulýan ugrudyr. Döwletimizde çaganyň saglygyny goraýyş ulgamyny hünärmenler, halkara talaplara laýyk gelýän zerur derman we saglygy goraýyş maksatly serişdeler bilen yzygiderli üpjün etmek, ulgamyň maddy-enjamlaýyn binýadyny pugtalandyrmak boýunça zerur işler geçirilýär. Şeýle-de ýurdumyzda çagalaryň irki ösüşi, olaryň saglyk ýagdaýyny barlamak we bar bolan keselleri anyklamak hem-de degişli bejergi çärelerini kesgitlemek üçin niýetlenen enjamlar, dünýäde iň täze görnüşli barlag enjamlary bilen üpjün edilen birnäçe merkezler hereket edýär.Gahryman Arkadagymyz Howandarlyga mätäç çagalara hemaýat bermek boýunça haýyr-sahawat gaznasynyň mümkinçiliklerinden peýdalanmak üçin ähli zerur şertleri döretdi.
Ýurdumyzda ÝUNISEF bilen çagalaryň saglygyny goramak boýunça alyp barýan gatnaşyklar ösdürilýär we bu ugurda daşary ýurtlaryň degişli düzümleri bilen hyzmatdaşlyk işjeňleşdirilýär. Döwletimizde poliomiýelit, drakunkulýoz, gyzzyrma keselleriniň doly ýok edilendigi, ýod ýetmezçiliginiň öňüni almak üçin duzy ýod bilen hem-de unuň düzümini demir we foliý turşusy bilen baýlaşdyrylandygy baradaky Bütindünýä Saglygy goraýyş we beýleki guramalar tarapyndan berlen halkara güwänamalary ösüşleriň hakyky güwänamasydyr. Şeýle-de ýurdumyz çilimkeşlige alnyp barylýan göreşe goşan ägirt goşandy üçin Bütindünýä saglygy goraýyş guramasynyň ýadygärlik nyşanyna hem-de Minnetdarlyk şahadatnamasyna mynasyp boldy.
„Sagdyn ene – sagdyn çaga – sagdyn geljek” atly milli strategiýanyň, Türkmenistanda ilatyň kesellere garşy göreşmek ukybyny ýokarlandyrmak boýunça Milli maksatnamanyň, Ýokanç däl keselleriň öňüni almak we garysyna göreşmek boýunça 2021 – 2025-nji ýyllar üçin Milli strategiýanyň, Türkmenistany temmäkiden azat ýurda öwürmek boýunça 2022 – 2025-nji ýyllar üçin Milli maksatnamanyň kabul edilmegi, ýurdumyzda nesil saglygynyň, sagdyn geljegiň ugrunda edilýän aladalaryň doly subutnamasydyr.
Döwletimizde Ýokanç kesellere garşy düýpli çäreler alnyp barylýar. Ýokarda agzalanlar barada biziň welaýatymyzda hem aýdara-diýere zat kän. Welaýat merkezimizde beýleki iri saglyk merkezler bilen bir hatarda Enäniň we çaganyň saglygyny goraýyş merkezi hem döwrebap mümkinçilikleriň gurşawunda işleýär. Bu ýerde enäniň we çaganyň saglygyny goramak babatynda, dürli ýokanç däl kesellere garşy çäreleriň düýpli toplumlaýyn işleri alnyp barylýar.
Hormatly Prezidentimiziň ýurdumyzda çagalar we olary saglygy ugrunda ummasyz aladalaryndan ugur alyp, eneleriň we çagalaryň saglygy üçin mundan beýläk hem jogapkärli işläris. Şeýle eşretli zamanany peşgeş beren, işlemäge, döretmäge, sagdyn nesli terbiýelemäge ajaýyp şertleri döredip berýän lukman Arkadagymyza, Arkadagly Serdarymyza tüýs ýürekden sagbolsun aýdýarys!
Şemşat ATAGELDIÝEWA,
Lebap welaýat Enäniň we çaganyň saglygyny goraýyş merkeziniň lukmany.
