Maňa mähir gerek, eje!
Ýaş şahyr gyzyň bu goşgulary ilkinji gezek okyjylara hödürlenýär
04-02-2022 / 5140
MÄHIR
…Mähir gyşda hasam gerek, bilýärdim.
A.Garaýewa.
Dünýämi ýyladar ýaly
Maňa mähir gerek, eje.
Göwnümden gam gider ýaly,
Maňa mähir gerek, eje.
Meýli, ýanyp tutaşaýyn,
Ataşlara sataşaýyn,
Ýöne, haýyş ýeke şaýlyk,
Maňa mähir gerek, eje.
Yşk bilen ara tow sala,
Düşmäýin dowla, howsala,
Kalbymdan gyşy kowsana,
Maňa mähir gerek, eje.
Aýdylmadyk söz andymda,
Ýamanlyk yog-a zandymda,
Iň ýetmeýän zadym munda,
Maňa mähir gerek, eje.
Menem ile sereşläýin,
Ýürek tarym taraşlaýyn,
Diňe senden garaşýaryn,
Maňa mähir gerek, eje!
EJEME
Deňizde arzuw küregim,
gaçdy gözümden geregim,
Ozal näzijek ýüregim
Bardy, ýaralandy eje.
Göwnüm boldy, köne haraz,
Dilegim duşmady, garaz,
Dilin dişläp, hyýalparaz
gyzyň gyralandy, eje.
Bilmedim şatlygy saklap,
Derdim guýuldy çanaklap,
Ne gözeldi, uçganaklan,
Didäm hyralandy eje.
Otda däl, közde ýanypdym,
Umydyma daýanypdym,
Men özüme ynanypdym,
Ynam, yralandy eje!
Ogulnur PIRJIKOWA,
Türkmen döwlet maliýe institutynyň talyby.
